Boletín IAU de divulgación da astronomía

Decembro #1

Neste boletín:

0) Nota editorial
1) Saíu a revista CAP número 30
2) A ONU proclama 2022 como o Ano Internacional das Ciencias Básicas para o Desenvolvemento Sostible
3) Noticias dos NOC: Iraq e Sudán
4) Ecsite Workroom Sharing Space
5) Mirando cara 2022: próximas conferencias e eventos
6) Oportunidades
7) Lecturas e recursos en liña recomendados
8) Boletín da Oficina IAU para a Divulgación da Astronomía noutros idiomas
9) Contribucións ao boletín da Oficina IAU para a Divulgación da Astronomía

0) Nota editorial

Prezados amigos, amigas e colegas,

Estamos moi felices de anunciar o lanzamento do número 30 de CAPJournal, onde temos a oportunidade de destacar o fantástico traballo das e dos practicantes que puideron seguir conectando coas súas comunidades e organizando eventos de astronomía incluso no momento álxido da pandemia. Tamén celebramos o paso do cometa Leonard, polo que vos convidamos a que compartades connosco as vosas imaxes e actividades públicas para a súa distribución nas canles de redes sociais da OAO.

Neste número, querémosvos axudar a prepararvos para 2022 destacando os próximos eventos e oportunidades. Agardamos que vos poida axudar a planificar un evento, unha iniciativa ou un programa para 2022, Ano Internacional das Ciencias Básicas para o Desenvolvemento Sostíbel, ou comezar a traballar en resumos para a conferencia ESO “O presente e o futuro da astronomía” ou outros eventos. Seguro que o voso calendario estará cheo.

Desexámosvos os ceos máis despexados e boa saúde!

Suzana Filipecki Martins e Lina Canas, en nome do equipo da Oficina IAU para a Divulgación da Astronomía

1) Saíu a revista CAP #30

O número 30 da revista Comunicar a Astronomía co Público xa está dispoñíbel! A edición especial co tema “Comunicación astronómica nun tempo de confinamento” conta con iniciativas de divulgación pública de varios colectivos que se enfrontaron ao reto de organizar eventos astronómicos para manterse conectados coas súas comunidades mesmo no momento álxido da pandemia. Entre os artigos incluídos están os seguintes: “Que facer en tempos extremos? Unha análise das accións de comunicación astronómica en Brasil durante a pandemia da COVID-19”; “Valerse da comunicación virtual inducida pola pandemia da COVID-19 para axudar a afrontar a crise climática”; e “Primeiros pasos na recadación de fondos para a divulgación da astronomía”.

Podes ler máis información e descargar o número aquí: https://www.capjournal.org/issues/30/

2) A ONU proclama 2022 como Ano Internacional das Ciencias Básicas para o Desenvolvemento Sostíbel

A resolución sobre a promulgación de 2022 como Ano Internacional das Ciencias Básicas para o Desenvolvemento Sostíbel foi aprobada por consenso na Asemblea Xeral das Nacións Unidas o pasado 2 de decembro. Coa Unión Astronómica Internacional como socia fundadora e no comité de dirección, o Ano Internacional das Ciencias Básicas para o Desenvolvemento Sostíbel (IYBSSD202) mobilizará as partes interesadas a todos os niveis para unha mellor integración dos resultados científicos nos procesos públicos de toma de decisións e para o desenvolvemento inclusivo das ciencias básicas. A conferencia de apertura está prevista para o 1 de xullo de 2022 na sede da UNESCO en París.

Máis información: https://www.iybssd2022.org/

3) Novas NOC: Iraq e Sudán

a) Astronomía e Público

O 19 de novembro, o NOC de Iraq Ali Jaber Al-Edhari presentou “Astronomía e público”, un acto público para introducir a astronomía e os fundamentos da observación astronómica. O evento tiña como obxectivo axudar a popularizar a cultura astronómica nas comunidades de Basora, Iraq.

b) Unha muller árabe no espazo: como conseguir unha carreira CTEM na industria espacial?

O NOC de Iraq tamén organizou unha conferencia en liña o 27 de novembro sobre a brecha de xénero na industria espacial, especialmente no que afecta as mulleres árabes. Diana Alsindy, enxeñeira de propulsión de Boeing, compartiu a súa experiencia como profesional espacial iraquí-estadounidense e as estratexias que utilizou para asegurar que a súa voz se escoitase nesta industria.

c) A astronomía é unha clase incríbel

O 2 de decembro, o NOC de Sudán Mohammed Yahya e o NOC adxunto de Sudán Abubakr Yagob presentaron a charla “A astronomía é unha clase incríbel” ao alumnado da Academia Ujuzi de Kenia.

4) Ecsite Workroom Sharing Space

A sesión final do “Ecsite Workroom Sharing Space” terá lugar o 15 de decembro cunha presentación de Jen Wong (Guerilla Science) e as palabras finais de Ewine van Dishoeck (Observatorio de Leiden). Coorganizado polo Observatorio de Leiden, a Unión Astronómica Internacional e o Trinity College de Dublín e financiado polo Premio Kavli, Sharing Space reúne a persoal investigador e profesionais da divulgación para desenvolveren actividades de participación pública durante catro sesións. Na páxina de Facebook de Ecsite están dispoñíbeis as gravacións dos discursos principais, incluíndo a doutora Gaitee Hussain da Axencia Espacial Europea, a doutora Kelly Blumenthal (Universidade de Leiden/Unión Astronómica Internacional), o profesor Henk Hoekstra (Universidade de Leiden) e o profesor Travis Rector (Universidade de Alaska).

Máis información: https://www.ecsite.eu/activities-and-services/ecsite-events/workrooms/sharing-space-creative-collaboration-public

5) Mirando cara a 2022: próximos congresos e eventos

a) O presente e o futuro da astronomía: unha mirada crítica sobre a contratación, os procesos de avaliación, a forma en que facemos ciencia e o noso papel na sociedade

“O presente e o futuro da astronomía: unha mirada crítica na contratación, os procesos de avaliación, a forma de facer ciencia e o noso papel na sociedade” desenvolveranse en liña do 14 ao 18 de febreiro de 2022. Organizado pola ESO, a xornada reunirá a comunidade astronómica e a profesionais de diferentes disciplinas científicas e sociais para debater a forma de facer ciencia e o noso papel na sociedade. Está previsto que a conferencia teña lugar en liña e a inscrición é de balde.

Sitio web: https://www.eso.org/sci/meetings/2022/ASTRO2022.html

b) Conferencia Anual e Asemblea Xeral da Sociedade Astronómica Africana (AfAS)

A Conferencia e Asemblea Xeral da Sociedade Astronómica Africana (AfAS) celebrarase como un evento híbrido do 14 ao 18 de marzo de 2022. A reunión presencial terá lugar no Observatorio Astronómico da África do Sur en Cidade do Cabo, África do Sur. A data límite para enviar resumos é o 10 de xaneiro de 2022.

Sitio web: https://www.africanastronomicalsociety.org/afas2022-ga/

c) A 29ª Conferencia da Sociedade Europea de Astronomía na Cultura (SEAC)

A 29ª Conferencia da Sociedade Europea de Astronomía na Cultura (SEAC) celebrarase en Timisoara, Romanía, do 5 ao 9 de setembro de 2022, centrada en temas de investigación como a arqueoastronomía, a etnoastronomía e a historia da astronomía. Data límite de envío de resumos: 14 de marzo de 2022.

Sitio web: http://www.seac2022.org/

6) Oportunidades

a) A Asociación da Semana Mundial do Espazo (WSWA) busca unha xestora ou xestor de programas e temas. A Asociación da Semana Mundial do Espazo (WSWA) busca unha xestora ou xestor de programas e temas que axude a apoiar a dirección executiva e o equipo global nos seus esforzos para liderar o maior evento espacial na Terra. É un posto remunerado, a tempo parcial, por un período de 1 ano. Espérase que a xestora ou xestor de temas e programas traballe entre 10 e 15 horas á semana, co apoio do equipo executivo. A xestora ou xestor debe ter experiencia no sector espacial, especialmente no campo da sustentabilidade espacial.

Máis información: https://www.worldspaceweek.org/news/wswa-seeks-theme-and-program-manager/

b) O International Worldwide Telescope Tour Contest convoca os organizadores locais

O International WWT Tour Contest (IWTC) ten como obxectivo animar o estudantado, a comunidade astrónoma afeccionada e o público en xeral a utilizar os datos astronómicos e a plataforma proporcionada polo WorldWide Telescope (WWT) para crear unha “visita guiada”, unha experiencia multimedia con guión que guíe o espectador a través do universo simulado de WWT. A Alianza Internacional de Observatorios Virtuais (IVOA), a Oficina IAU de Astronomía para o Desenvolvemento, a Sociedade Astronómica Americana (AAS) e a Sociedade Astronómica Chinesa (CAS), que organizan o IWTC, convidan as e os profesionais a supervisaren os concursos no seu país ou rexión. Se estás interesada ou interesado en organizar unha competición local, ponte en contacto con Shanshan Li (lishanshan@nao.cas.cn).

Máis información: https://contest.worldwidetelescope.org/

c) Abertas as solicitudes para a sétima quenda de KiboCUBE (até o 31 de decembro de 2021)

KiboCUBE é unha cooperación a longo prazo entre a Oficina das Nacións Unidas para Asuntos do Espazo Exterior (UNOOSA) e a Axencia de Exploración Aeroespacial de Xapón (JAXA) que ofrece aos países en desenvolvemento a oportunidade de despregar un Satélite Cubo (CubeSat) desde o Módulo do Experimento Xaponés da Estación Espacial Internacional “Kibo”. Os equipos seleccionados deben desenvolver, operar e utilizar os seus CubeSats. A sétima quenda de KiboCUBE está aberta a solicitudes até o 31 de decembro de 2021.

Máis información: https://www.unoosa.org/oosa/en/ourwork/access2space4all/KiboCUBE/KiboCUBE_Rounds.html

d) O proxecto de investigación GlobalSCAPE invita a comunicadores e comunicadoras de ciencia a unirse a unha enquisa diaria durante un ano

O proxecto de investigación GlobalSCAPE, financiado pola UE, invita a comunicadoras e comunicadores científicos de todo o mundo a compartir as súas experiencias nunha enquisa diaria dun ano. As respostas utilizaranse tanto para a investigación académica como para informar do desenvolvemento de iniciativas globais para mellorar as condicións da práctica da comunicación científica. As persoas participantes neste estudo teñen a oportunidade de unirse a unha comunidade global de comunicadoras e comunicadores científicos, con acceso especial a recursos profesionais de vangarda desenvolvidos polo proxecto e os seus socios. As persoas participantes na enquisa optarán a gañar vales electrónicos por un máximo de 500 € (aprox. 560 USD) por persoa.

Máis información: https://global-scape.eu/

7) Lecturas recomendadas e recursos en liña

a) Informe e recursos do informe da enquisa decenal Astro2020
Cales son os principais desafíos científicos para a astronomía e a astrofísica na próxima década? “Camiños de Descubrimento en Astronomía e Astrofísica para a década de 2020”, a última enquisa decenal das Academias Nacionais dos EEUU, identifica os obxectivos científicos máis convincentes e presenta un ambicioso programa de actividades terrestres e espaciais para investimentos futuros.

Máis información: https://www.nap.edu/catalog/26141/pathways-to-discovery-in-astronomy-and-astrophysics-for-the-2020s

b) Seminario de Ciencia Cidadá Africana

Os proxectos de ciencia cidadá poden ser unha boa forma para que calquera entusiasta da astronomía adquira habilidades valiosas e contribúa á investigación científica utilizando datos científicos reais. Para aquelas persoas que non puideron asistir ao Seminario de Ciencia Cidadá Africano, celebrado o 20 de novembro, a Sociedade Astronómica Africana (AfAS) puxo dispoñíbel en liña a gravación do evento: https://www.youtube.com/watch?v=78VEGkDOMm8

c) Estrelas da ciencia africana, número 2

En novembro de 2021, Science Stars publicou o segundo número da súa revista trimestral “African Science Stars”. Este último número afonda nas tendencias da ciencia africana, visita Sutherland (África do Sur) e Botswana, fai un perfil de tres destacadas mulleres científicas, descríbense as 10 mellores universidades de astronomía de África, conta a historia da astronomía en Exipto da man da doutora de Exipto Somaya Saad. Tamén se enumeran eventos e se inclúen outras historias que ofrecen aos lectores e lectoras novos información sobre financiamento, tendencias e feitos científicos.

Podes ler a revista nesta ligazón: https://assap.co.za/wp-content/uploads/2021/11/ASSIssue2.pdf

8) Boletín da Oficina IAU para a Divulgación da Astronomía noutros idiomas

O noso boletín ten tradución aos seguintes idiomas:

Árabe: https://stargazersbh.wixsite.com/bsac/iau
Traducións grazas aos membros do Club de Observación Astronómica de Bahrain.

Chinés (Simplificado): https://sdas.wh.sdu.edu.cn/info/1657/1261.htm
Tradución grazas ao Dr Chen Cao, Sociedade Astronómica Shandong (SDAS) de China.

Español: http://asafile.blogspot.jp/p/blog-page_12.html
Traducións grazas a Emilio Zúñiga, da Asociación de Astrónomos Aficionados de León, Nicaragua.

Francés: https://haitiastronomie.blogspot.com/p/bulletin-dinformationde-luai-sur.html
Traducións grazas a Rulx Narcisse da Sociedade Astronómica Haitiana.

Galego: http://agrupacionio.com/gl/tag/boletin-iau
Traducións grazas a Martin Pawley e Xabier Pérez Couto da Agrupación Astronómica Coruñesa Ío en España.

Italiano: https://www.astronomiamo.it/DivulgazioneAstronomica/Newsletter-IAU/last
Traducións grazas a Eleonora Piromalli de AstronomiAmo en Italia.

Portugués (europeo): https://drive.google.com/drive/folders/1wN1txv57CLoDbLEEwNjStBMk6CrlkTxu?usp=sharing
Traducións grazas a Catarina Leote, João Ferreira e Jonas Souza a través do grupo de lingua portuguesa da Rede de Tradución Astronómica.

Xaponés: https://docs.google.com/document/d/1yko0aYt8OMK9g8KDA_m1hq5ik5xVEEI1UE7Y2GhGl70/edit#heading=h.kecmyoqyl8e9
Traducións grazas a Akihiko Tomita a través da Rede de Tradución Astronómica. Se queres recibir a tradución ao xaponés do boletín, subscríbete á Asociación Xaponesa de Astrónomos Afeccionados (http://www.jaaa-astro.jp/jaaa-ml.html) ou á Sociedade Xaponesa pola Educación e Divulgación da Astronomía (http://www.tenkyo.net/).

Se queredes traducir o noso boletín ao voso idioma, por favor escribídenos a public@oao.iau.org.