Que: conferencia de Andrea Rodríguez Antón co título «Miradas diversas ao ceo desde a astronomía cultural». Na súa charla, a astrofísica fará unha introdución á astronomía cultural e o seu papel no coñecemento das sociedades humanas. Na primeira parte recorrerase á cúpula estrelada do planetario como soporte para explicar os cambios básicos na visibilidade do ceo, para despois facer un breve repaso por diferentes lugares da historia galega nos que o ceo estaría presente no deseño e organización do espazo e a xestión do tempo. Entrada libre até completar capacidade.

Quen: Andrea Rodríguez Antón é doutora en astrofísica e investigadora do INCIPIT (Instituto de Ciencias do Patrimonio) de Santiago de Compostela. Tamén traballou no Instituto de Astrofísica de Canarias e outros centros de investigación. No último ano participou no asesoramento para a creación dun centro de interpretación do patrimonio histórico en Ausserd (Sahara Occidental). Na actualidade participa no medio dixital turismodeestrellas.com elaborando unha sección de divulgación sobre Astronomía Cultural.

Onde: no planetario da Casa das Ciencias (A Coruña).

Cando: xoves 15 de decembro ás 19:30.