A exposición “Con A de Astrónomas” poderase visitar do 2 ao 15 de setembro no Fórum Metropolitano e do 16 ao 30 28 do mesmo mes no Ágora. A profesora de astronomía e astrofísica Josefina Ling contextualizará a exposición cunha conferencia no Ágora o 16 de setembro.
A Agrupación Astronómica Coruñesa Ío achega á Coruña a exposición “Con A de Astrónomas” do 2 ao 15 de setembro no Fórum Metropolitano e do 16 ata o 30 28 do mesmo mes no Ágora. Ademais, o día 16 de setembro ás 12 da mañá a comisaria da exposición, Josefina Ling, profesora de astronomía e astrofísica da Facultade de Matemáticas da Universidade de Santiago, explicará o papel da muller na astronomía. A conferencia da profesora Ling encádrase dentro do programa Coruña científica: ciclo de astronomía, que ten como obxectivo fomentar o debate científico e divulgativo dentro da cidade.
Para a Agrupación Astronómica Coruñesa Ío é importante que a cidade da Coruña poida gozar, pública e gratuitamente, desta exposición na que se repasan os principais fitos da astrofísica, desde a antigüidade ata os nosos días, nos que o papel da muller foi fundamental. O descubrimento dos púlsares, a estrutura a gran escala do universo ou a medida das distancias estelares son algúns dos exemplos explicados nos seus trece paneis.
Na preparación da mostra participaron nove astrónomas de distintos centros de investigación, entre elas Josefina Ling (Observatorio astronómico Ramón Mª Aller da USC e membro da Unión Astronómica Internacional), comisaria da exposición xunto á historiadora da ciencia Eulalia Pérez Sedeño (CCHS-CSIC).
A Agrupación Astronómica Coruñesa Ío constitúese en 2002 como resposta á inquietude dun grupo de afeccionados á astronomía co dobre obxectivo de gozar do ceo estrelado e contaxiar esa paixón a outras persoas. Nestes quince anos creceu paulatinamente e no últimos tres dobrou a cifra de persoas asociadas. Na actualidade, está formada por 150 socias e socios, 20 satélites (socios/as infantís de 0 a 13 anos) e 3 entidades colaboradoras. É a asociación con maior número de membros de Galicia e a sétima de España.